Афиша

Драма, 2 пәрдәдә
12+

«Мулла»
19:00 04 сентябрь 2020

"Мулла" спектакле – дөнья, заман, җәмгыять, яшәү хакында уйланыр өчен җитди сәбәп, рухы белән дингә якын булучыларга бигрәк тә.
Автор Т.Миңнуллин тамашачы алдына психологик күзлектән караганда шактый катлаулы ситуацияне китереп куя. Берьюлы берничә проблема, бик күп сораулар. Яшь эшкуар Самат туган авылында мәчет салдыра. Аллаһ йорты буш тора, анда йөрүче юк. Нигә? Тамашачы җавап табарга тиешле беренче сорау бу.
Самат беркемгә кирәге булмаган яңа мәчеттә эшләргә Әсфәндияр хәзрәтне чакыра. Муллага бары 22 яшь. Яңа урында аңа үзен ничек тотарга? Нәрсәдән башларга? Болар барысы да спектакль сюжетына кискенлек өсти, әсәр каһарманнарына теләктәшлеккә этәрә.
Өстәвенә Әсфәндияр хәзрәтнең моңа кадәрге тормышының да гади генә булмаганлыгы ачыклана: әти-әнисез үскән, инде балигъ булмаганнар колониясенең бар кыенлыгын үтәргә өлгергән икән ләбаса ул! Соңрак мәдрәсә тәмамлаган. Күренеп тора, уйланырга җирлек бар. Спектакль җитди проблемалар хакында уйланучы, тормышны тирәннән аңлап, мәңгелек кыйммәтләр биеклегеннән фикер йөртүчеләр өчен.

Режиссер - Рамил Фазлыев (Татарстан Республикасының атказанган сәнгать эшлеклесе)
Рәссам - Сергей Скоморохов (Г.Тукай һәм М.Җәлил исемендәге премияләр лауреаты, Россиянең атказанган, Татарстанның халык рәссамы)


Драма, 2 пәрдәдә
12+

«Әниемнен ак күлмәге»
19:00 11 сентябрь 2020

Ана күңеле – балада, бала күңеле – далада, диләр. Әлеге гыйбарә ни дәрәҗәдә дөреслеккә туры килә? Үлгәнче үзенең баласы турында кайгыручы ана белән тормыш мәшәкатьләре арасында әнисе өчен вакыт таба алмаган бала язмышы шулкадәр таныш – Ананың балалары инде үсеп, кеше булганнар, кошлар сыман кайсы-кая таралышып беткәннәр. Тормыш көтәр өчен инде әни кирәк тә түгел, Сәяр Ана хәер-фатихасыннан, туганнары хуплавыннан башка өйләнеп куйган. Һәркемнең үз мәшәкате – көндәлек ыгы-зыгыларда Ана, аның яшәү белән үлем арасында ялгыз басып калуы кемгә генә кирәк соң? Шәриф Хөсәеновның "Әниемнең ак күлмәге" драмасы моннан ярты гасыр элек иҗат ителүенә карамастан, әле дә җәмгыятебезнең авырткан ярасына кагыла, Ана һәм бала, туганлык, кешелеклелек кебек мәңгелек сораулар хакында уйга сала.

Куючы режиссер – Рамил Фазлыев
Композитор - Марат Әхмәтшин
Рәссам - Сергей Скоморохов


ДРАМАТИК ХИКӘЯ
12+

«Күз нурларым»
19:00 18 сентябрь 2020

Кешенең иң бәхетле чагы кайчан? Офык аръягындагы хыялларга йөгергәндә янәшәдән чын тормышның узып китүен искәрүче бармы? Ир белән Хатын матди байлыкка ни өчен рухи югалтулар аша ирешә? Малы белән дөньяны мөгезеннән алдым дигәннәр бәхетлеме? Соңгы сулышыңда бер йотым су бирердәй кешең булмау - күпләрнең коточкыч чынбарлыгы түгелме? Драматик хикәядә күтәрелгән сорауларга җавап һәркемнең йөрәк биеклегендә табылыр кебек.

Онлайн театр